1

H:N hannar fyrstu séríslensku emojiin

11

Smelltu til að spila

14

Loksins! Loksins! Loksins! Fyrstu séríslensku myndtáknin (e. emoji) líta dagsins ljós! Og auðvitað hönnuð af okkur á H:N! Táknin eru þrettán talsins en þar skjótum við m.a. út í kosmosinn táknum fyrir fössara, pulsu, fálkaorðu og „þetta reddast“. 

Erfiðlega hefur reynst að tjá mörg íslensk hugtök með þeim táknum sem boðið er upp á í helstu android- og apple-símum. Við höfum því ráðist í gerð séríslenskra emojia til þess að Íslendingar geti tjáð sínar tilfinningar af innlifun í símum og á samfélagsmiðlum. 

Við skorum hér með á stýrikerfa- og appframleiðendur að innleiða þessi tákn svo að Íslendingar geti staðið öðrum þjóðum jafnfætis í tilfinningatáknatjáningu á 21. öldinni! Enn fremur förum við þess á leit við Íslendinga að þeir leggi sitt af mörkum með því að senda bréf á framleiðendur með áskorun um að koma þessum alíslensku táknum í gagnið – því hvað er verra en fólk sem getur ekki tjáð tilfinningar sínar á samfélagsmiðlum?

Ef stýrikerfa- og appframleiðendur innleiða þessi tákn geta allir (ekki bara Íslendingar) HÚH-að og fössað sig í gang; og sent vælubíla og fálkaorður eftir því sem við á.

Emoji er japanskt hugtak sem þýðir myndtákn. Upphafsmaður þess er Shigetaka Kurita, starfsmaður hjá japönsku margmiðlunarfyrirtæki sem í lok 10. áratugarins leitaði nýrra leiða til aðgreiningar frá samkeppnisaðilum. Myndtáknin eru mikið notuð og talið er að  um 6 milljarðar emoji-tákna berist manna á milli daglega. Táknin hafa náð slíkri fótfestu að gulur broskarl sem grætur úr hlátri var valinn „orð" ársins árið 2015 í árlegu vali Oxford-orðabókarinnar. Erfiðlega hefur gengið að finna íslenskt orð fyrir emoji en í sjónvarpsþættinum Orðbragði í gær var lagt til orðið tjákn.

Við viljum færa íslensku þjóðinni þessi emoji að gjöf og mælumst til þess að allir noti þau að vild sér til ánægju og skemmtunar.

Táknin þrettán má sjá hér að neðan:

Ein með ölluEinmedollu

Hvert mannsbarn þekkir pylsuna og þjóðarréttinn pylsu með öllu en þessi herramannsmatur tilheyrir menningu margra þjóða. Hins vegar spilar pylsan stóra rullu í matarmenningu Íslendinga og hugtakið „að pulsa sig upp” er séríslenskt. Hér er komið myndtákn fyrir athöfnina að pulsa sig upp.

FálkaorðanFalkaorda

Það er æði fallegt að hrósa einstaklingum og maður verður meiri fyrir vikið. Í myndtáknasamskiptum hefur fólk notast við táknið "100%", bikara, klappandi hendur og fleiri tákn. Loks er komin séríslensk lausn á þessu þjóðþrifamáli. Nú hrósum við samborgurum okkar í gríð og erg og hengjum um háls þeirra fálkaorðuna!

Fözzari Fozz

Orðið fössari var orð ársins 2015 að mati lesenda ruv.is. Fössari er vitaskuld föstudagur en þó ekki eingöngu föstudagur í dagatalinu. Fössari getur verið hugarástand sem lýsir almennu stuði og gleði. Einstaklingur í þrumustuði sem spilar partítónlist út í eitt hefur t.a.m. greinst með alvarlegan fössara í blóðinu.

Geysir Geysir

Fyrir utan að vera goshver í Haukadal á Suðurlandi er Geysir myndhverfing þess að vera alveg að springa. Springa úr tilhlökkun. Springa úr reiði. Springa úr vanlíðan. Geysir og Gullfoss eiga þann vafasama heiður sameiginlegan að vera samheiti yfir iðrakvef; þ.e. uppköst og niðurgang. Loks gleyma fáir, sem það sáu, Helgu Brögu úr Fóstbræðrum æpa upp að rekkjunauti sínum: „Ekki láta Geysi gjósa, ekki láta Geysi gjósa!”. Látum þá merkingu liggja milli hluta.

Víkingaklappið Huhh

Skosk/garðbæska víkingaklappið sem fór sem eldur í sinu hér um landið, breiddist út sem spænska veikin um Evrópu, og varð loks að alheimspest, er mögulega í rénun. Margir fagna því - aðrir láta engan bilbug á sér finna og nota hvert tækifæri sem gefst, hvar sem fleiri en tveir Íslendingar hittast, að rétta upp hendurnar og öskra „HÚH!“. Notagildi myndtáknsins fer eftir því hvorum hópnum þú tilheyrir.

Jóhanna Sig Johannasig

Sögnin að „jóhanna sig” er ekki formlega hluti af tungumálinu en við leggjum til að merking þeirrar sagnar verði sú að tími manns muni koma síðar. Ekki gefast upp. Þinn tími mun koma!
Ef vinur þinn er að niðurlotum kominn eða bugaður af einhverjum ástæðum, sendu þá Jóhönnu myndtáknið og fáðu viðkomandi til  að „jóhanna sig”. Tími hans eða hennar mun koma!

Davíð Dabbikongur

Allir þekkja Davíð Oddsson. Einfaldlega vegna þess að hann er kóngurinn. Dabbi kóngur. Hvað sem hverjum þykir um pólitík hans þá hefur hann gegnt mörgum af mikilvægustu stöðum okkar samfélags; borgarstjóra, forsætisráðherra, seðlabankastjóra og næstum því forseta. Hvar hefur Davíð ekki drepið niður fæti? Það er því ljóst að Davíðs-myndtáknið mun verða vinsælt við fjölbreytilegustu aðstæður.

Kjamminn Kjammi

Kjamm’ er snilld! Sviðakjammi er auðvitað ekkert annað en sviðinn kindahaus en hann getur staðið fyrir svo margt annað. Það er vitaskuld fátt íslenskara en íslenska sauðkindin. Svið eru mikilvægur þáttur í sögu íslenskrar matarhefðar og vísa í horfna lifnaðarhætti. Það væri hægt að heimfæra kjammann yfir á hinu leiðinlegu orðræðu um höfuðborg og landsbyggð en við sleppum því og hlökkum til að sjá hvernig kjamminn plumar sig í samskiptum fólks.

Lundinn Lundi

Einhverra hluta vegna hefur blessaður lundinn lent í því að vera táknmynd græðgi og yfirgangs í ferðamannaiðnaðinum. Andliti lundans prýðir nú ýmsan söluvarning svo sem lyklakippur, bangsa, kveikjara, svuntur og annað sem ferðamenn vilja ólmir taka með sér heim af klakanum. Á sama tíma hefur blessuð sauðkindin, sem líklega er orðin pirruð á ástandinu, varla lent á ísskápssegli.

Stolt Pride

Gleðiganga hefur lengi verið hápunktur Hinsegin daga í Reykjavík. Í henni hafa m.a. sameinast hommar, lesbíur, tvíkynhneigðir og aðrir hinsegin einstaklingar ásamt fjölskyldum og vinum. Gangan hefur síðustu misseri verið sameiningartákn stolts og gleði og heiðrað rétt allra til þess að fá að vera eins og þeir eru. Einhyrningur Páls Óskars er verðugur fulltrúi gleði og stolts.

Vælubíllinn 113

Það þarf að bregðast við þeim sem kvarta og kveina yfir hinu og þessu á netinu. Vælubíllinn er þekkt fyrirbæri sem kemur þá til bjargar. Númerið er 113 en það er svo sem óþarfi að hringja, myndtáknið ætti strax að stela glæpnum.

Þetta reddast! Reddast

Það er einungis eitt íslenskt hugtak eða orðtak sem ekki finnst í neinu öðru tungumáli. Ef það er eitthvað sem lýsir hugarfari landsmanna eða almennu fasi þá er það þetta mikilvæga orðtak: „Þetta reddast!”. Ef við ekki hefðum þennan frasa þá værum við ekki lengur stödd á þessu skeri.

Læda slæda Slide

Það er vissulega margt í þjóðfélaginu sem maður getur pirrað sig yfir og sumir vilja meina að tuð sé mikið þjóðarsport. Hins vegar er hægt að láta hitt og þetta eins og vind um eyru þjóta og stundum er bara miklu betra að láta hlutina „slæda”. Ég er alveg að tryllast yfir verðlaginu á Íslandi … en ég „læda slæda”. Ég er alveg komin með nóg af handbolta í sjónvarpinu … en ég „læda slæda”.